Майхантын аманд Нийгмийн хамгааллын тусгай төв барьж, ашиглалтад орууллаа

Баянзүрх дүүргийн 20 дугаар хорооны нутаг, Улиастайн Майхантын аманд орон гэргүй болон эмзэг бүлгийн иргэдэд зориулсан Нийгмийн хамгааллын тусгай төв барьж, ашиглалтад оруулжээ. Сургалт, хүмүүжлийн зориулалт бүхий тус төв нь дөрвөн давхар, зоорийн хэсэг­тэй, нийт 2368.8 ам метр талбайтай. Зорилтот бүлгийн 200-250 иргэнийг нэг дор сурган хүмүүжүүлж, нийгэмд бие даан амьдрахад нь дэмжлэг үзүүлэхийн са­цуу хөдөлмөр эрхлэлтийг бүх талаар нь дэмжсэн үйлчилгээний цогц төв байхаар барилгыг төлөвлөсөн байна.

Улсын төсвийн хөрөнгөөр барьсан энэхүү төв нь зохион байгуулалтын хувьд чий­рэгжүүлэлтийн танхим, ур­лаг заал, нөхөн сэргээх эмчилгээ, эм­чийн үзлэг, сэтгэл зүйн зөвлөгөө өгөх өрөөнүүд, ажил­чид, уулзалт, оффисын ал­бан та­сал­гаа зэргээс бүрдсэн аж. Мөн оёдол, гар урлал, мужааны цех, сургалт, хүмүүж­лийн зориулалт бүхий бусад өрөөг ч иж бүрнээр нь сүүлийн үеийн шийдлээр тохижуулсан гэнэ. Түүнчлэн уурын зуух, гүний худгийн барилга, харуулын байр зэргийг цогцоор нь барьжээ. Гаднах тохижилтын ажлын хүрээнд авто зогсоол, явган хүний зам, талбай, гэрэлтүүлгийг мөн шийдсэн гэв. Тус бүтээн байгуулалтыг “Тэмээн” ХХК гүй­цэт­гэж, нийслэлийн Хөрөнгө оруу­лал­тын газар техникийн хяналт тавьсан байна.

О.Ундрах