Байгаль орчны аудитын тусгай зөвшөөрөл олгох, сунгах үйл явцыг бүрэн цахимжуулснаа Байгаль орчин, уур амьсгалын өөрчлөлтийн яамнаас мэдээлэв. Тодруулбал, аж ахуйн нэгжүүд зөвшөөрлийн цахим систем болох license.mn-д шаардлага хангасан материалаа бүрдүүлж, байршуулсан тохиолдолд 10 минутын дотор зөвшөөрөл гарах боломжтой болсон аж. Урьд нь аудитын тусгай зөвшөөрөл олгох, сунгахад тушаал, гарын үсэг, тамга гээд олон шат дамжиж, бичиг баримтын бүрдүүлэлтээс шалтгаалан 14 хоногоос нэг сар хүртэл хугацаа шаарддаг байж. Цаашид яамнаас олгодог тусгай зөвшөөрлүүдийг үе шаттай цахим хэлбэрт шилжүүлэх гэнэ.
Ташрамд, байгалийн нөөц ашиглагч аж ахуйн нэгжүүд хоёр жил тутам аудит хийлгэх хуулийн үүрэгтэй.
Ч.Цэлмэг
