УИХ-ын гишүүн П.Сайнзориг болон Х.Тайван нарыг яллагдагчаар тооцлоо

УИХ-ын гишүүн П.Сайнзориг, Тагнуулын ерөнхий газрын дарга асан, хошууч генерал Б.Хурцын хүү Х.Тай­ван нар хоёрдугаар сарын 5-6-нд шилжих шөнө Сүх­баатар дүүргийн I хорооны нутаг, “Шангрила” зочид буудлын B1 давхарт байрлах цэнгээний га­зарт нэг­нийхээ эрүүл мэндэд хохирол учруулж халд­сан хэ­рэг өдүүлсэн билээ. Уг хэргийг Сүхбаатар дүүр­гийн Цагдаагийн газрын I хэлтэст шалгаж, прокурорын бай­гууллагаас Эрүүгийн хуулийн 11.6-1 дэх хэс­гийн бусдын эрүүл мэндэд хөнгөн хохирол санаатай учруулсан гэх үндэслэлээр өнгөрсөн сарын 24-нд ял­лаг­дагчаар татах тогтоол баталсан байна.

Тэгвэл Х.Тайванд яллагдагчаар татах тогтоо­лыг өнгөрсөн баасан гарагт танилцуулсан аж. Ул­маар ял­лагдагч Х.Тайванд Монгол Улсын хилээр гара­хыг хяз­гаарлах, хэргийн бусад оролцогч болох гэрч Т.М, Б.Н нартай уулзахыг хориглох хязгаарлалт тог­тоох таслан сэргийлэх арга хэмжээ авах тухай саналыг Сүхбаатар дүүргийн Прокурорын газрын хянал­тын прокурор Дүүргийн эрүү, иргэний хэргийн хял­бар ажиллагааны анхан шатны тойргийн шүүхэд тухайн өдөр хүргүүлжээ.

Шүүхээс Х.Тайванг эрүүгийн хэрэг хянан шийдвэр­лэх ажиллагаанд саад учруулахгүй байх зорил­гоор өнгөрсөн баасан гаргаас эхлэн Монгол Улсын хи­лээр гарахыг хязгаарлах, дээрх гэрчүүдтэй уулзахыг хориг­лох хязгаарлалт таслан сэргийлэх арга хэмжээг эл шүү­хийн шүүгч Д.Даваадорж авсан байна.

Г.Орчлон