БНХАУ 2035 он гэхэд нэг хүнд ногдох ДНБ-ий хэмжээг 2020 оныхоос хоёр дахин нэмэгдүүлнэ

БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуан тус улсын XV таван жилийн төлөвлөгөө болон Монгол-Хятадын харилцаа, хамтын ажиллагааны талаар өнгөрсөн баа­сан гарагт мэдээлэл өглөө. Жил бүр уламж­лал бол­гон зохион байгуулдаг Хя­та­дын “Хоёр чуул­ган” амжилттай болсныг онцолж, тэрбээр энэхүү арга хэмжээ нь тус улсын бодлого, хөгжлийн чиг хандлагыг танин мэдэх, Хятадын боломжийг ашиглах “цонх” болд­гийг тодотгов. Мөн өнөө жил Хятадын Ком­мунист нам (КН) байгуулагдсаны 105 жи­лийн ой тохиож буй бөгөөд Хятад улс XV та­ван жилийн төлөвлөгөөгөө хэрэгжүүлж эхлэх хариуцлагатай үедээ ирснийг илт­гэлдээ дурдсан юм.

БНХАУ-ын XV таван жилийн төлөв­лөгөөнд эдийн засгийн бүтээн байгуулалтад онц­гой­лон анхаарч, хөгжлийг урагш­луу­лахыг гол чиглэлээ болгожээ. Үүний зэрэгцээ инновацын шинэчлэлийг хөдөлгөгч хүч бол­гон ашиглаж, иргэдийнхээ өдрөөс өдөрт өсөн нэмэгдэж буй хэрэгцээг хангах, амьд­ралын чанарыг дээшлүүлэхийг нэн тэргүүний зорилт гэж тодорхойлсон байна. Уг баримт бичигт 20 үндсэн үзүүлэлт тусгасны дотор до­тоодын нийт бүтээгдэхүүн (ДНБ)-ийг тогт­вортой хэмжээнд барих, ту­хайн жилийн нөх­цөлд тохируулан зо­рил­тоо тодорхойлох зэ­рэг асуудлыг баг­таа­сан аж. Мөн 2035 он гэхэд нэг хүнд ногдох ДНБ-ий хэмжээг 2020 оныхоос хоёр дахин нэ­мэг­дүүлж, дунд түвшний хөгжилтэй ор­нуу­дын эгнээнд хүр­гэхээр төлөв­лөжээ

Хятадын тал Монгол Улстай дэд бүтцийн холболтыг бэхжүүлэх хүрээнд Ганцмод-Гашуунсухайтын хил дамнасан төмөр за­мын бүтээн байгуулалтыг эхлүүлээд буй. Ингэснээр 70 жилийн дараа хоёр дахь хил дамнасан төмөр замын гарцтай болох юм. Мөн Хятадын тусламжаар За­мын-Үүд болон Гашуунсухайтын хи­лийн боомтын байгуу­ламжуудыг барьж, ашиг­лалтад оруулсан бөгөөд Монгол-Хятад-Оросыг холбосон тө­мөр замын “Төв ко­ридор”-ыг шинэчлэн сайж­руулах төслийг тогтвортой хэрэгжүүлж байгааг дуулгав. Эрээн-Замын-Үүдийн эдийн зас­гийн хам­тын ажил­лагааны бүсийн бүтээн бай­гуулалтыг эрчимжүүлж байгаа нь хоёр орны уял­даа холбоо болон гадаад худалдааны ирээ­дүйн өсөлтөд хүчтэй тулгуур болохыг тэр­бээр онцоллоо. Элчин сайд Шэнь Миньжуан “Цөлжилтөөс сэргийлэх, сааруулах болон ногоон хөгжлийн хамтын ажиллагааг хэрэгжүүлэх нь хоёр улсын Төрийн тэргүүн нарын чухал тохиролцоо бөгөөд энэ нь иргэдийн амьжиргаанд бодит үр өгөөжөө өгөх учиртай. Өнгөрсөн онд Монгол Улсаас 90 сая тонн нүүрс нийлүүлсэн нь түүхэн ам­жилт болсон. Цаа­шид БНХАУ хөдөө аж ахуйн бү­ тээг­дэ­хүү­ний импортыг нэмэгдүүлэх, газ­рын ховор эле­ментийн салбарт хамтран ажил­лах со­нир­хол­той байгаа” гэв.

Өмнөх таван жилийн төлөвлөгөөний үр дүнг харвал, Хятадын эдийн засаг өнгөрсөн жил таван хувиар өсөж, нийт хэмжээ нь 20 их наяд ам.доллароос давжээ. Энэ нь дэлхийн эдийн засгийн өсөлтийн бараг 30 хувийг Хятад улс дангаараа бүрдүүлж буй гэсэн үг юм. Мөн тус улс аж үйлдвэрийн салбараараа дэлхийд 16 жил дараалан тэргүүлж буй. Түүнчлэн хиймэл оюун, сансар судлал зэрэг технологийн салбарт ч томоохон амжилт гаргаад байна.

У.Цэцэг