“Төгсөлтийн аргачлалын туршилтын хөтөлбөр”-ийн үр дүнг 96 хувьтай гэж үнэлсэн бөгөөд нийт өрхийн 80.6 хувь нь шалгуур хангаж, хөтөлбөрөөс олгосон тоног төхөөрөмжийг ашиглан өрхийн үйлдвэрлэл эрхэлдэг болжээ. Өмнө нь өрхийн гишүүдийн 33.6 хувь нь хөдөлмөр эрхэлж байсан бол хөтөлбөр хэрэгжүүлсний дараа эл үзүүлэлт 93.3 хувь болж, орлогын эх үүсвэр нь ч дагаад нэмэгдсэн аж.
Хөтөлбөрийн талаар Азийн хөгжлийн банкныхан “Бид төслийн үр нөлөө, түүнээс гарсан санал, зөвлөмжүүдэд үндэслэн дараагийн шатны буюу “Зорилтот өрхийн хөдөлмөр эрхлэлтийг дэмжих, амьжиргааг дээшлүүлэх хөтөлбөр”-өө хэрэгжүүлж эхлээд байна. Өмнө нь хамрагдсан айл өрхүүд дараа дараагийнхдаа туршлага болж, хөтөлбөрийг цаашид илүү үр ашигтай хэрэгжүүлэх, хамрах хүрээг өргөжүүлэх, орон нутгийнхны оролцоог хангахад чухал үүрэг гүйцэтгэсэн” гэв.
О.Оргилох
