204.6 мянган жуулчин Монголд ирсэн ч өмнөд солонгосчуудын тоо огцом буурав 

Монгол Улс 2026 он гарсаар нийт 204 600 гаруй жуулчин хүлээн авсныг Аялал жуулчлалын мэргэжлийн холбооноос мэдээллээ. Энэ нь өмнөх оны мөн үеэс 15, 2024 оныхоос 53.9 хувиар өссөн үзүүлэлт болж байна. Манай улсад ирсэн жуулчдын 41 хувь нь хойд, 31 хувь нь урд хөршийнхөн, долоон хувь нь өмнөд солонгос, гурван хувь нь япон хүмүүс байгаа аж. Энэ хугацаанд БНСУ-аас ирэх жуулчдын тоо өмнөх оны мөн үеэс 47 хувиар буурсан нь анхаарал татаж байгаа бөгөөд сүүлийн жилүүдэд манай аялал жуулчлалын салбарт жин дарах болсон хангүг үндэстэн яагаад Монголыг зорих нь багассаныг судлах шаардлагатай гэнэ. Харин германчууд 23.7, япон жуулчдын тоо 7.7 хувиар тус тус өсжээ. 

2026 онд Монгол Улс нэг сая жуулчин хүлээн авч, аялал жуулчлалаас нэг тэрбум ам.доллар олох зорилт тавиад буй. Иймд энэ жил аялал жуулчлалын компаниудад 250 тэрбум төгрөгийн хөнгөлөлттэй зээл олгохоор төлөвлөсөн боловч өдгөө 1053 аж ахуйн нэгж, нийт 2.3 их наяд төгрөг хүсжээ. Өөрөөр хэлбэл, хөнгөлөлттэй зээлд хамрагдах хүсэлт нь төлөвлөсөн санхүүжилтээсээ ес дахин өндөр байгаа аж. Иймд шалгуурыг нь тодорхой болгохоос гадна зээл авсан аж ахуйн нэгжүүдийн мэдээллийг нээлттэй байлгах, 500 сая төгрөгөөс дээш дүнтэй зээлд хяналтын гэрээ байгуулж, зарцуулалтад тавих хяналтыг сайжруулахаар ярилцаж буй гэнэ.