100 000 хүнд ногдох үзүүлэлтээр ослын тоо 2023 онд 34 байсан бол 2024 онд 72-т хүрсэн байна. Энэ нь бүх цаг үеийн хамгийн өндөр түвшин гэнэ. Тэгвэл 2025 онд 68 болж, бага зэрэг буурсан ч энэ нь хангалтгүй гэдгийг Хөдөлмөрийн аюулгүй байдал, эрүүл мэндийн төвийнхөн хэлсэн. Осолд өртөгсдийг хүйсээр нь авч үзвэл олонх нь буюу 90 гаруй хувь нь эрэгтэй. Уг статистик нь ажлын байрны эрсдэл, аюулгүй ажиллагааны хэрэгжилтэд онцгой анхаарах шаардлагатайг харуулж буй юм.
Түүнчлэн өнгөрсөн онд үйлдвэрлэлийн ослоор нийт 73 хүн нас барж, мэргэжлээс шалтгаалах өвчнөөр 2046 хүн хөдөлмөрийн чадвараа алджээ. Уул уурхай, хүнд үйлдвэрийн салбарын ажилчид үйлдвэрлэлийн осол, мэргэжлээс шалтгаалах өвчинд ийн олноор өртөх болжээ. Тэр дундаа барилгын салбарын осол огцом нэмэгдсэн тул ажил олгогчид хуульд заасны дагуу ажилчдынхаа хөдөлмөрийн аюулгүй байдлыг сайтар хангаж, холбогдох дүрэм журмыг чанд мөрдөхийг албаныхан сануулав.
О.Ундрах
