Францын нээлттэй тэмцээний нийт шагналын сан 61 723 000 евро (одоогийн ханшаар бараг 72 сая ам.доллар) болж, дээд амжилт тогтоохоор байна. Энэ нь өнгөрсөн оноос 9.53 хувиар өссөн үзүүлэлт юм. Гэсэн хэдий ч шагналын сангийн өсөлт нь теннисчдийн сэтгэл дундуур байдлыг намжааж чадсангүй. Гол асуудал нь шагналын бус, харин тэмцээний нийт орлогоос тоглогчдод хуваарилж буй хувь хэмжээ юм. Янз бүрийн үнэлгээгээр 2026 оны шагналын сан нь “Ролан Гаррос”-ын нийт орлогын ойролцоогоор 14-15 хувийг эзэлж байгаа нь тоглогчдын шаарддаг 22 хувиас бага бөгөөд ATP болон WTA-гийн хамтарсан тэмцээнүүдэд тамирчдад хуваарилдаг дундаж хувиас доогуур байна. Түүнчлэн Францын теннисний холбооноос санал болгосон шагналын сангийн өсөлт нь өнгөрсөн жилийнхээс (өөрөөр хэлбэл 2025 оныг 2024 онтой харьцуулсан өсөлтөөс) бараг хоёр дахин их байгаа ч АНУ-ын болон Австралийн нээлттэй тэмцээний өнгөрсөн жилийн өсөлтөд хүрэхгүй байгаа. Тодруулбал, өнгөрсөн жилийн US Open-ий шагналын сан 20, Australian Open-ы шагналын сан бараг 16 хувиар өссөн байна. Дэлхийн шилдэг 20 теннисчин, тэр дундаа Н.Жокович, Я.Синнер, К.Алькарас, А.Соболенко нар хамтарсан мэдэгдэл гаргаж, Францын нээлттэй тэмцээнд санал болгож буй шагналын сангийн түвшинд сэтгэл дундуур байгаагаа илэрхийлжээ. Гэхдээ “Ролан Гаррос”-ын нийт шагналын сан аль хэдийн Уимблдонтой бараг зэрэгцэж ирсэн. Гэсэн ч өмнөх улирлуудын жишгийг харгалзан үзвэл 2026 онд Лондон хотод зохион байгуулагдах тэмцээнд шагналын мөнгийг дахин нэмэгдүүлж, “Ролан Гаррос”-оос илүү гарах магадлал өндөр байна.
Н.Энх
