Улаан буудайн ангиллаас шалтгаалж тонн тутмыг нь 1.1-1.4 сая төгрөгөөр худалдан авахаар боллоо 

ХХААХҮЯ, Хөдөө аж ахуйн корпорац (ХААК)-аас стратегийн нөөц бүрдүүлэх ажлын хүрээнд улаан буудайн үйлдвэрлэлийн өртөгт суурилсан худалдан авах үнийн тооцоолол гаргаснаа Монголын та­риаланчдын үндэсний холбоонд танил­цуулжээ. Үнэ тогтоохдоо 11 аймгийн 41 сумын 120 гаруй тариаланч, аж ахуйн нэгжийг хамруулсан өртгийн судалгаа хийсэн гэнэ. ХААК-ынх­ны боловс­руулсан жишиг үнэ, та­риа­ланч­ дын холбооны саналыг үндэслэж улаан буудайн ханшийг албан ёсоор дараах байд­лаар тогтоосон байна. Үүнд I ангиллын улаан буудайг тонн тутмыг нь 1 450 000, II ангиллынхыг 1 350 000, III ан­гиллынхыг 1 250 000, IV ангиллынхыг 1 150 000 төгрөгөөр худалдан авахаар болов. 

Дотоодын хэрэгцээг хангах, үнэ тогт­воржуулах зорилгоор энэ онд 100 мянган тонн хүнсний улаан буудай нөөц­лөх бөгөөд ингэхдээ өртөгт суурил­сан, тариаланчдад ашигтай үнээр ху­дал­даж авах шийдвэрийг Засгийн газ­раас гаргаж, зардлыг улсын төсөвт тус­гажээ. Энэ нь нийт хураах улаан буу­дайн гуравны нэгтэй тэнцэж буй юм. Нөөц бүрдүүлэхтэй холбогдуулан сал­барын сайд гурил үйлдвэрлэгч ком­паниудын төлөөлөлтэй мөн уулзаж, үйлдвэрлэл, борлуулалтаа хэвийн явуулах, үнэ нэмэхгүй байхад ан­хаа­рахыг хүсэж, улмаар импортын гу­рилыг хязгаарлаж, гэрчилгээ олгохыг зог­соосноо дуулгажээ.

О.Ундрах