Нийслэлийн 378 жилийн ойг тохиолдуулан НИТХ-ын дарга С.Амарсайхан, Нийслэлийн Засаг дарга бөгөөд Улаанбаатар хотын Захирагч С.Батболд болон холбогдох албахынхан өнөөдөр Монголын нууц товчоо, Мэлхийт хөшөө-нд хүндэтгэл үзүүлж, Сүлдэт хуур цэнгүүллээ.
1639 онд өндөр гэгээн Занабазарыг Их Монголын шарын шашны тэргүүнд өргөмжлөн өргөө байгуулан өгснөөр Монгол улсын нийслэлийн үүслийг тавьсан түүхтэй. Тэр цагаас хойш 29 удаа бууриа сэлгэж, 1778 онд Богдхан уулын ар, хатан Туулын хөвөө, сэрүүн Сэлбийн дэнж, Хүн чулууны хонхорт суурьшихдаа нүүдэллэн ирсний тэмдэг болгож “Хүн чулуун хөшөө”-гөөр шав тавьжээ. Энэхүү түүхэн үйл явдлыг мөнхжүүлэх, хойч үедээ таниулан сурталчлах зорилгоор тус шав тавьсан газрын хойхно хэсэгт 1994 онд дурсгалын Мэлхийт хөшөөг босгож, нийслэлийнхээ ойгоор хүндэтгэл үзүүлдэг уламжлалтай болсон гэдгийг НИТХ-ын дарга С.Амарсайхан дурьдлаа.
Мөн үеэр Монгол Улсын Үндэсний урлагийн их театрийн Монгол төрийн их найрал хөгжмийн гоцлооч, Ардын жүжигчин, Морин хуурьч Ч.Батсайхан нийслэлийн Сүлдэт хуурыг цэнгүүлж, Улаанбаатар чуулгын гоцлол дуучин, Гавъяат жүжигчин С.Ганзориг “Миний Улаанбаатар” дуугаар ая барилаа.
Мөн Улаанбаатар хот үүсэн байгуулагдсаны ойн өдрөөр гал голомтоо бадрааж буй гэр бүлд нийслэлийн удирдлагууд хүндэтгэл үзүүлдэг түүхэн уламжлалтай. Энэ дагуу өнөөдөр хуримаа хийж буй Б.Бадралтын гэр бүлд НИТХ-ын дарга С.Амарсайхан, Нийслэлийн Засаг дарга С.Батболд нар хүндэтгэл үзүүлж, гарын бэлэг гардуулав. Нийслэлийн 63 дугаар цэцэрлэгийн багш Б.Бадралт, П.Цэвэлмаа нар эдүгээ 4 хүүхэд төрүүлэн өсгөсөн бөгөөд өрх тусгаарласнаас 20 жилийн дараа ийнхүү хуримаа хийж байгаа аж.
Нийслэлийн 378 жилийн ойг тохиолдуулан өнөөдөр Д.Сүхбаатарын талбайд Монгол Улсын төрийн далбаа, Нийслэлийн тугийг мандуулах ёслол болов.
Туг мандуулах ёслолд НИТХ-ын дарга С.Амарсайхан, Нийслэлийн Засаг дарга бөгөөд Улаанбаатар хотын Захирагч С.Батболд болон нийслэлийн үе үеийн удирдлагууд оролцлоо.
Нийслэлийн туганд Богдхан уулын уламжлалт шүтээн Хангарьдыг дүрсэлсэн байдаг. Хангарьд нь бат түвшин эрэмгий байдлыг илэрхийлж нийслэл хот өргөжиж алдар нэр нь тив дэлхийд мандан бадрахын утга санааг агуулна. Мөн Хангарьд нь магнайдаа төрт ёс, эрдэм мэдлэгийн бэлгэдэл соёмбо тэмдэгтэй, баруун гартаа түмэн олондоо үүд хаалгаа цэлгэр сайхнаар нээж өөдлөн дэвшихийн санааг илэрхийлсэн очир бариулт түлхүүр, зүүн гартаа энэлэн үгүй ариун тэгш оршихуйн баталгаа бадам цэцгийг нандигнан барьж, аливаа хорын үндсийг эгнэгт устган дарах санааг илэрхийлэн могойг гишгэн зогсож буйг дүрсэлжээ.
