Ромын папын Африк дахь айлчлал шүүмжлэл дагуулав 

Америк гаралтай анхны Ромын пап XIV Леогийн Африк тивийн дөрвөн улсад (Алжир, Камерун, Ангол, Экваторын Гвиней) хийсэн 11 хоногийн түүхэн айлчлал өнөөдөр өндөрлөнө. Хэдийгээр уг үйл явдал сүсэгтэн олны дунд ихээхэн хүлээлт үүсгэсэн ч зарим талаар шүүмж­лэл дагуулав. Ялангуяа хүний эрхийн зөр­чил ихтэй, төрийн эрхийг удаан хугацааны турш нэг хүний гарт төвлөрүүлсэн Камерун, Экваторын Гвиней зэрэг улсад айлчилсан нь дарангуйллын дэглэмийг зөвтгөж буй үйлдэл хэмээн олон нийт шүүмжилж байна. Тухайлбал, Камерун улсыг Пол Бия 43, Эк­ваторын Гвинейг Теодоро Обианг 46 дахь жилдээ тасралтгүй удирдаж байгаа юм. 

Энэ талаар хүний эрхийн хуульч Туту Аликанте CNN агентлагт өгсөн ярилцлагадаа “Дэл­хийн дипломат тавцанд нөлөө бүхий дүр болох Ромын пап эдгээр авторитар дэглэмтэй оронд зочилсон нь дарангуйллыг сайшаасан сөрөг дохиог олон улсад өгч болзошгүй” гэжээ. Хэдийгээр айлчлалын эргэн тойронд улс төрийн талцал өрнөж буй ч пап лам XIV Лео өөрийн илтгэлүүддээ авлига, байгалийн баял­гийн мөлжлөгийн эсрэг хатуу байр суурь илэр­хийлсээр байв. Тэрбээр Камеруны Ерөнхий­лөгчийн ордонд зочлохдоо “Энх тайван, шу­дарга ёсыг тогтоохын тулд авлигын гинжин хэлхээг таслах ёстой” хэмээн сануулсан аж. 

Ташрамд дурдахад, пап Францисыг залгамж­лан, Гэгээн Петрийн сэнтийд залрах 267 дахь хамбаар тодорсон кардинал Роберт При­вост нь 1955 онд Чикаго хотод Испани, Франц-Итали гаралтай гэр бүлд төржээ. Хүүхэд бай­хаасаа Гэгээн Мэригийн сүмд өргөлийн ширээний туслахаар ажилласан тэрбээр англи, ис­пани, итали, франц, португалаар чөлөөтэй ярь­даг төдийгүй латин, герман хэлээр уншиж су­далдаг хэл шинжлэлийн өндөр боловсролтой нэгэн юм.

Э.Сүйлэн