“Crossing bridges” фестивальд есөн орны 150 гаруй гэрэл зурагчин оролцож байна 

“Crossing bridges” олон ул­сын гэрэл зургийн 23 дахь удаагийн фестиваль Улаанбаатар хот­ноо энэ сарын 3-9нд болж байна. Жил бүр уламжлал болгон зохион бай­гуул­даг тус фестиваль нь зөвхөн гэ­рэл зургийн урал­даан бус, улс орнуудын соёлын со­лил­цоо, най­рамдал болон аялал жуулч­ла­лын хамтын ажил­лагааг өргөжүүлэх зорил­го­той олон улсын нэр хүндтэй наадам юм. Ур­ла­гаар дам­жуулан улс орнуудыг холбох гүүр болд­гоороо онцлогтой уг арга хэмжээнд өнөө жил Монгол, Филиппин, Син­гапур, Индонез, Ма­лайз, Узбе­кис­тан, Авст­рали, Вьетнам, Шри-Ланк зэрэг есөн орны 150 га­руй уран бүтээлч орол­цож байна. 

Фестивалийн хүрээнд оролцогчид Улаанбаатар хот болон нийслэл орчмын соёл, аялал жуулчлалын гол байршлуудаарфото аялал хийж байна. Тухайлбал, Чойжин ламын сүм музей, Гандантэгчэнлин хийдийн цам харайх ёслол, “Мянган морьтон” наадам зэрэг түүх, соёлын онцлог бүхий арга хэмжээний зураг авчээ. Олон улсын гэрэл зурагчдын дурандаа буулгасан эдгээр бүтээл нь Монголын түүх, өв соёл, шашин, нүүдэлчдийн ахуй болон нийслэлийг дэлхий дахинд сурталчлан таниулахад чухал ач холбогдолтой аж. Наадмын төгсгөлд шилдэг бүтээлүүдийг тодруулах юм байна. 

Монголын Гэрэл зурагчдын нэгдсэн холбооны удирдах зөвлөлийн гишүүн Г.Эрдэнэтуяа “Мон­гол Улс “Crossing bridges” олон улсын гэрэл зургийн фестивальд хоёр жилийн өмнөөс орол­цож эхэлсэн. Энэхүү арга хэмжээг эх орондоо зохион байгуулж байгаа нь Монголын гэрэл зурагчдын хувьд бахархалтай үйл явдал юм. Энэ удаад Улаанбаатарт цугласан гадаад, дотоодын гэрэл зурагчид нэг үйл явдлыг 150 өөр өнцгөөс харуулж буйгаараа онцлогтой” хэмээв.

Э.Сүйлэн