Баянзүрх дүүрэгт бүртгэгдсэн менингитийн сэжигтэй тохиолдын хариу сөрөг гарлаа

Нийслэлийн Баянгол, Баянзүрх дүү­рэгт менингококкт халдварын сэжиг­тэй тохиолдолд бүртгэгдэж, ХӨСҮТ-ийн хя­налтад, хэвтүүлэн эмчилж буй талаар бид өмнөх дугаартаа мэ­дээл­сэн билээ. Тэгвэл Баянзүрх дүүр­гийн сэжигтэй то­хиолдлын шин­жил­гээний хариу сө­рөг буюу халд­вар­гүй гэж гарсныг ЭМЯ, ХӨСҮТ-өөс өчигдөр мэдээллээ. Ту­хайн хүүхэд тус дүүргийн 311 дүгээр цэцэр­лэгт хүмүүждэг бөгөөд ойрын хавьт­луудыг нь тусгаарлалтаас гаргасан байна. Ха­рин Баянгол дүүргээс өвчний сэжиг­тэй шинж тэмдэг илэрч,  ХӨСҮТ-д хүргэгд­сэн хүүхэд арванхоёрдугаар сарын 18-наас хойш хичээлдээ яваагүй  бөгөөд шинжилгээг нь хийсээр байгаа гэнэ. Онош баталгаажуулах шин­жил­гээг хийхэд 48-56 цаг зарцуулдаг. Хэ­рэв хариу нь эерэг гарвал тухайн аппарат богино хугацаанд автоматаар дохио өгдөг тул олон цагаар шинжлэх тусам аюул багатай гэж үздэг байна. ХӨСҮТ-д хүргэгдсэн дээрх хоёр хүүхдийн биеийн байдал тогтвортой, шинж тэмдгийн эсрэг эмчилгээ хийл­гэж байгааг ал­ба­ны­хан хэлсэн. Халд­варын сэжигтэй тохиолдол нэмж бүрт­гэг­дээгүй. 
Ташрамд дурдахад, менингит нь ихэвчлэн дуслын замаар халдварладаг учраас тухайн өвчтөнтэй хамгийн ойр харилцдаг гэр бүлийнхэн, ангийнхан, хамт олон нь халдвар авах эрсдэл илүү өндөр. Ханиад, томуу шиг хурдацтай тарх­даггүй, өвчтөнтэй нэг гэрт амь­дардаггүй, нэг ангид суралцдаггүй бол эрс­дэл бага гэдгийг эмч нар хэлсэн. Менингококкийн нян нь 30-35 хэмд үрждэг тул ам, хоолойн орчныг байнга өөр­чилж, саримс, нимбэг, давсны уус­малаар зайлан, халуун, бүлээн шингэн тогт­мол уухыг иргэдэд зөвлөв.

О.Оргилох