Менделеевийн нэрэмжит шинжлэх ухааны олон улсын шагналын энэ оны шалгаруулалтыг ЮНЕСКО-гоос зарлажээ. Суурь шинжлэх ухааны боловсрол, судалгаа болон олон улсын хамтын ажиллагаанд хувь нэмэр оруулсан эрдэмтдийг урамшуулах зорилгоор 2021 оноос эл шагналыг олгож эхэлсэн. Уг шагналыг жил бүр хоёр эрдэмтэнд олгож буй юм байна. Ингэхдээ эрдэмтэн тус бүрд 250 000 ам.долларын урамшуулал өгдөг. Монгол эрдэмтэд энэхүү сонгон шалгаруулалтад оролцохыг ЮНЕСКО-гийн Монголын үндэсний комиссоос уриалжээ. Оролцохыг хүссэн эрдэмтэн, судлаачид тус комиссоор дамжуулан ирэх сарын15-ны дотор нэрээ дэвшүүлэх боломжтой юм байна.
Эл шагналын бас нэг зорилго нь залуучууд, охидыг шинжлэх ухааны чиглэлээр сурч боловсрох, хөгжин дэвшихэд дэмжлэг үзүүлэх аж. Тиймээс шинжлэх ухааны салбарт ажиллаж буй эмэгтэйчүүд нэрээ дэвшүүлэх нь давуу талтай гэнэ.
