Ардчилсан намын даргад өрсөлдөгч таван эрхэм 21 аймгаар тойрч гишүүд дэмжигчдээсээ санал гуйсаар яваа. Бараг бүх аймагт хүрч, АН-ын даргад өрсөлдөх болсон шалтгаан, мөрийн хөтөлбөрөө танилцуулав. Харин тэдний нэг Н.Алтанхуяг бусад дөрвөөсөө тэс өөр менежменттэй явна. Түүнд мөрийн хөтөлбөр, даргад өрсөлдөх зорилго гэж алга хэмээн намынх нь нөхөд халаглан сууна. Тэрбээр АН-ын гишүүдтэй уулзахдаа “Мөрийн хөтөлбөр боловсруулж амжаагүй, нэр дэвшье гэж нэг их бодсонгүй. Хүмүүс зөвлөхөөр нь мөнгө өө төлөөд ороод ирлээ” гэдэг үгийг уулзалт бүрийнхээ эхэнд хэлж байгаа.
Мөрийн хөтөлбөргүйн дээр АН-ын дарга болно гэж бодоогүй юм бол энэ хүн юу хийж яваа юм бол гэж гайхан суух хүмүүс ч байх аж. Энэ асуултын хариултыг Н.Алтанхуягийн явсан замаар Ерөнхийлөгч Ц.Элбэгдоржийн нэр хүнд унаж, харлаж байгаагаас харж болно. Н.Алтанхуяг өөрт олгогдсон 20 минутынхаа 17-д нь Ерөнхийлөгч Ц.Элбэгдоржийг харааж, зүхэж, Н.Энхбаяраас ч дор авилгач болсон гэдгийг ард түмний ой тойнд эргэлт буцалтгүйгээр шингээж байна.
Эндээс дарга болох бодолгүй, намаа шинэчлэх мөрийн хөтөлбөргүй Н.Алтанхуягийн үндсэн зорилго тодорч байгаа юм.
Өнөөдрийн байдлаар Н.Алтанхуягтай холбоотой, хамаатнуудтайгаа нийлж тендерийн "мөнгө идсэн" гэх хэргийн зургаан ч хавтаст хэрэг хаагдаагүй байгаа. Дээр нь АН-ын байрыг зарсан мөнгөнөөс дутсан 10 тэрбум төгрөг ч түүнийг ийн хавтаст хэрэг рүү хөтөлж магадгүй. Энэ бүхнээс улбаатайгаар Төрийн тэргүүндээ өширхөж явдаг бололтой аж. Харин Н.Алтанхуяг даргын үндсэн зорилго тун сайн биелж байгааг өнгөрсөн долоо хоногт болсон Утааны уулзалтаас харж болно. Тэгэхэд монголчууд бараг бүгдээрээ төрийн тэргүүн рүүгээ "нулимсан" нь зөвхөн Н.Алтанхуягтай холбоотой байсан сурагтай.
