“Г.Доржзодов боловсруулсан төлөвлөгөөгөө бидэнд танилцуулсан”

“60 тэрбум”-ын гэх бичлэгийн нэг дүр болсон А.Ганбаатар өчигдөр мэдээлэл хийлээ. МАН-ын гишүүн, “Шинэ Монгол хаад” группийн эзэн, Нийслэлийн МАН-ын хорооны дарга Ц.Сандуйн зөвлөх тэрбээр дээрх бичлэг цацагдсанаас хойш хууль, хяналтын байгууллагаар шалгуулсан тул хэвлэл, мэдээллийнхэнд хандах боломжгүй явснаа тайлбарлав. Тэр­бээр “60 тэрбум”-ын гэх бичлэгийг цацсан иргэн Г.Доржзодов өөрийн боловсруулсан стратеги, санхүүгийн схем, төлөвлөгөөг бидэнд санал бол­госон. 2016 оны сонгуулийн өмнө ОХУ, 2012 оны сонгуулиар АН энэхүү схемийг ашиглаж байсан хэмээн танилцуулсан. “Шинэ Монгол хаад” группийн байрны дөрвөн давхрын өрөөнд уулзаж, сонгуульд оролцох нийслэлийн МАН-ын хорооны төлөв­лөгөөг Г.Доржзодовынхтой хамтат­ган ярилцсан нь үнэн. Гэвч тэр уул­залтад байсан хүмүүсийн яриа бичлэгт байхгүй. Харин уулзалтад оролцоогүй хүмүүсийн дуу хоолойг эвлүүлэг­тээ оруулсан. Уулзалтад нийслэлийн МАН-ын хорооны дарга Ц.Сандуй, Шадар сайд У.Хүрэлсүх, МАН-ын ерөнхий нарийн бичгийн дарга Д.Амарбаясгалан, УИХ-ын гишүүн Л.Оюун-Эрдэнэ, иргэн Г.Доржзодов болон миний бие байсан. Энэ үеэр 60 тэрбум төгрөгийн талаар яриагүйг У.Хүрэлсүх сайд, Л.Оюун-Эрдэнэ ги­шүүн нар яагаад ярихгүй байгаа нь сонин. Намынх нь нэр хүндэд халд­сан худал мэдээлэл цацагдсан бай­хад тэд яагаад дуугарахгүй суугааг гайхаж байна. Үүнээс 10 хоногийн дараа Г.Доржзодов бүр нарийвчил­сан төлөвлөгөө танилцуулсан. Би нэг ч удаа төрийн албанд ажиллаж үзээгүй, санхүүгийн өндөр мэдлэг­гүй учраас ойлгоогүй ч тухайн үед тоглоом болгон ярьсан зүйл бий. Тэ­гэхэд Г.Доржзодов бид хоёр хоёулх­наа уулзсан. Зөвхөн бид хоёрын дунд өрнөсөн яриан дунд эвлүү­лэг оруулсан. Олон ч уулзалтад Г.Доржзодов хамт байсан. Тэр болго­ны бичлэгийг эвлүүлэн тарааж байна. Нөгөө талаас миний дуу хоолойг ямар ч хэлбэрээр дуурайх боломжтой. Г.Доржзодовын танилцуулсан схе­мийг сонссон хүн буруудаж байгаа бол тухайн өдөр хамт байсан У.Хүрэлсүх сайд, Л.Оюун-Эрдэнэ гишүүн, ерөнхий нарийн бичгийн дарга Д.Амарбаясгалан нарт ч эл хэрэг хамаатай. Тухайн өдөр бид­ний уулзсаныг нотлох гэрэл зураг, өөр баримт бий” гээд хуулийн бай­гууллагын шалгалт дууссаны да­раа тодорхой баримт дэлгэхээ хэл­сэн. Тэрбээр Ц.Сандуй, У.Хүрэлсүх, Д.Амарбаясгалан, Л.Оюун-Эрдэнэ нарын хамт авахуулсан зургуудыг үзүүлсэн юм.

Түүний өмгөөлөгч Ц.Энхтайван “60 тэрбум”-ын гэх бичлэгийг эв­лүүлэг болохыг тогтоосон байхад ир­гэн А.Ганбаатарын нэр хүндэд халдсан гэж үзэж, Хан-Уул дүүргийн Иргэний хэргийн анхан шатны шүүхэд гомдол гаргасан талаар мэдээлсэн. Уг гомд­лын дагуу зургадугаар сарын 2-нд “Эх сурвалж нь тодорхойгүй эвлүү­лэг хийсэн материалыг олон ний­тийн мэдээллийн хэрэгслээр тарааж, А.Ганбаатарын нэр хүндэд халдсан” хэмээн шүүхээс шийдвэрлэсэн гэнэ.